കൊളസ്ട്രോൾ കുറയ്ക്കണോ? ഈ 6 പ്രഭാത ശീലങ്ങൾ പിന്തുടരൂ

ആരോഗ്യകരമായ ഹൃദയത്തിന് കൊളസ്ട്രോളിന്റെ അളവ് നിയന്ത്രിക്കണം. ചില ശീലങ്ങൾ ദൈനംദിന ജീവിതത്തിന്റെ ഭാഗമാക്കുന്നത് കൊളസ്ട്രോൾ നിയന്ത്രണത്തിൽ കാര്യമായ മാറ്റമുണ്ടാക്കും. നിങ്ങൾ എന്ത് കഴിക്കുന്നു, നിങ്ങളുടെ ഒരു ദിവസം എങ്ങനെ തുടങ്ങുന്നു തുടങ്ങി ചെറുതും ഫലപ്രദവുമായ മാറ്റങ്ങൾ കാലക്രമേണ കൊളസ്ട്രോൾ അളവ് മെച്ചപ്പെടുത്താൻ സഹായിക്കും.

ഉയർന്ന കൊളസ്ട്രോൾ ഉള്ളവർക്ക് ദൈനംദിന ജീവിതത്തിൽ ചില പ്രഭാത ശീലങ്ങൾ ഉൾപ്പെടുത്തുന്നത് നല്ല മാറ്റമുണ്ടാക്കും. ഏഷ്യൻ ഹോസ്പിറ്റലിലെ ഇന്റർവെൻഷണൽ കാർഡിയോളജിയിലെ സീനിയർ കൺസൾട്ടന്റായ ഡോ. പ്രതീക് ചൗധരി കൊളസ്ട്രോൾ കുറയ്ക്കാൻ സഹായിക്കുന്ന 6 ശീലങ്ങളെക്കുറിച്ച് വിശദീകരിച്ചിട്ടുണ്ട്.

പ്രഭാത നടത്തം: ആഴ്ചയിൽ 5 ദിവസമെങ്കിലും കുറഞ്ഞത് 30 മിനിറ്റെങ്കിലും നടക്കുന്നത് കൊളസ്ട്രോൾ കുറയ്ക്കുന്നതിനും, അമിതവണ്ണം കുറയ്ക്കുന്നതിനും ഗുണം ചെയ്യും. 

പൂരിത കൊഴുപ്പ് കുറയ്ക്കുക: റെഡ് മീറ്റ്, കൊഴുപ്പുള്ള പാലുൽപ്പന്നങ്ങൾ തുടങ്ങിയ പൂരിത കൊഴുപ്പ് കൂടുതലുള്ള ഭക്ഷണങ്ങൾ പ്രഭാതഭക്ഷണ സമയത്ത് ഒഴിവാക്കുക. ഈ ഭക്ഷണങ്ങൾ മൊത്തം കൊളസ്ട്രോളിന്റെ അളവ് വർധിപ്പിക്കും.

ട്രാൻസ് ഫാറ്റ് ഒഴിവാക്കുക: കേക്കുകൾ, കുക്കികൾ, സംസ്കരിച്ച ഭക്ഷണങ്ങൾ എന്നിവയിൽ കാണപ്പെടുന്ന ട്രാൻസ് ഫാറ്റുകൾ പ്രഭാത ദിനചര്യയിൽ നിന്ന് ഒഴിവാക്കണം. അവ കൊളസ്ട്രോളിന്റെ അളവിനെ പ്രതികൂലമായി ബാധിക്കുന്നു.

ലയിക്കുന്ന നാരുകൾ കൂട്ടുക: ലയിക്കുന്ന നാരുകൾ അടങ്ങിയ ഭക്ഷണങ്ങളായ ഓട്സ്, ചിയ സീഡ്സ്, പഴങ്ങൾ എന്നിവ പ്രഭാതഭക്ഷണത്തിൽ ചേർക്കുക. ഇവ കൊളസ്ട്രോൾ അളവ് നിയന്ത്രിക്കാൻ സഹായിക്കുന്നു.

നട്സ്: ബദാം, വാൽനട്ട്, അല്ലെങ്കിൽ ഫ്ളാക്സ് സീഡുകൾ എന്നിവ പ്രഭാത ദിനചര്യയിൽ ഉൾപ്പെടുത്തുക. ഈ നട്സുകളിൽ ഒമേഗ-3 ഫാറ്റി ആസിഡുകൾ അടങ്ങിയിട്ടുണ്ട്. ഇവ എച്ച്ഡിഎൽ (നല്ല കൊളസ്ട്രോൾ) അളവ് മെച്ചപ്പെടുത്താൻ സഹായിക്കുന്നു.

ഇളം ചൂടുള്ള വെള്ളം കുടിച്ച് ദിവസം ആരംഭിക്കുക: ഒരു ഗ്ലാസ് ചെറുചൂടുള്ള വെള്ളത്തിൽ നാരങ്ങ ചേർത്ത് കുടിക്കുന്നത് ഉപാപചയ പ്രവർത്തനം മെച്ചപ്പെടുത്താനും, ശരീരത്തിലെ ജലാംശം വർധിപ്പിക്കാനും, ഹൃദയാരോഗ്യം മെച്ചപ്പെടുത്താനും സഹായിക്കും.

ഈ പ്രഭാത ശീലങ്ങൾ കൊളസ്ട്രോൾ നിയന്ത്രണത്തിന് സഹായിക്കുമെങ്കിലും, വ്യക്തിഗത ഉപദേശത്തിനായി ആരോഗ്യ വിദഗ്ധരെ സമീപിക്കുകയും ഹൃദയാരോഗ്യം പതിവായി നിരീക്ഷിക്കുകയും ചെയ്യണമെന്ന് അദ്ദേഹം ആവശ്യപ്പെട്ടു.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• ഷുഗർ ഫ്രീ ഉത്പന്നങ്ങളിൽ പഞ്ചസാര അടങ്ങിയിട്ടുണ്ടോ? അവ പ്രമേഹ രോഗികൾക്ക് ഗുണകരമോ?
• രാവിലെയോ അതോ വൈകിട്ടത്തെ നടത്തമോ? ആരോഗ്യത്തിന് കൂടുതൽ ഗുണകരം ഏതാണ്?
• വേദനയ്ക്ക് ആശ്വാസം, ശരീര ഭാരം കുറയ്ക്കും; ദിവസവും ഒരു ടീ‌സ്‌പൂൺ ഇഞ്ചി പൊടി കഴിക്കാം
• വെള്ളത്തിൽ കുതിർത്ത ബദാം കഴിച്ച് ദിവസം തുടങ്ങൂ; അറിയാം ഗുണങ്ങൾ